माई मेरौ मन मोह्यो सांवरे मोहि

माई मेरो मन मोह्यो, सांवरे मोहि, घर अंगना न सुहाई माई,अब हाँ हो माई ।
ज्यों  ज्यों  आँखिन   देखियै  मेरौ,   त्यों त्यों  जिय ललचाई माई ।। १ ।। मेरो मन...

हेली मनमोहन अति सोह्नौ ईत व्है निकस्यों आई माई, अब हाँ हो माई ।
मोहि   देखि   ठाडौ  भयौ   वह,   चितयौ   मुरि     मुसकाई    माई ।। २ ।। मेरो मन...

रूप ठगोरी डारि कैं चल्यौ, अंग छबि छैल दिखाई माई, अब हाँ हो माई ।
नैन   सैन   दे   साँवरौ   मन   लै    गयो   संग        लगाई     माई ।। ३ ।। मेरो मन...

लोक लाज कुल कांनि की  जिय कछू  न ठीक ठहराई माई, अब हाँ हो माई ।
कै लै चलि मोहि स्याम पै कै स्याम   ही   आनि     मिलाई   माई ।। ४ ।। मेरो मन...

प्रान प्रीति परबस  परे  अब, काहू की न बस्याई  माई, अब हाँ हो माई ।
रसिक   बाल   नंदलाल   पै   रसिक   सदां   बल       जाई   माई  ।। ५ ।। मेरो मन...