સજનીરી ગાવો મંગલ ચાર

બ્યાહ અને શેહરાનું પદ 

સજનીરી ગાવો મંગલ ચાર |

ચિરજીયો    વૃષભાન    નંદિની    દુલ્હે    નંદકુમાર || ૧ ||

મોહનકે શિર   મુકુટ   બિરાજત   રાધાકે    ઉર  હાર |

નીલામ્બર પીતામ્બરકી છબી શોભા અમિત  અપાર || ૨ ||

મંડપ   છાયો   દેખ   બરસાને   બેઠે   નંદ      ઉદાર |

ભામર લેત પ્રિયા ઔર પ્રીતમ તનમન   દીજે  વાર || ૩ ||

યહ જોરી અવિચલ શ્રી વૃંદાવન ક્રીડત કરત વિહાર |

પરમાનંદ   મનોરથ  પૂરન  ભક્તન  પ્રાણ  આધાર || ૪ ||

आज ललनकी होत सगाई

ब्याह और शेहराका पद

आज ललनकी होत सगाई |

आवोरी    गोपीजन    मिलकें     गावो     मंगल    चार   बधाई || १ ||

चोटी     चुपर     गुहूँ     सूत      तेरी      छान्ड़ो       चंचलताई |

वृषभान     गोप     टीको   दे   पठ्यो     सुन्दरजान     कन्हाई || २ ||

जो    तुमको     या    भान्त    देख   है   कर   हैं   कहा    बड़ाई |

पहर     बसन    आभूषण     सुन्दर     उनको     देऊ    दिखाई || ३ ||

नखशिख  अंग  शृंगार   महार  मन  मोतिनकी  माला  पहराई |

बैठे   आय   रत्न   चौकी   पर     नारिनकी     भीर       सुहाई  || ४ ||

विप्र प्रवीण  तिलक  कर मस्तक  अक्षत चांप  लियो  अपनाई  |

बाजत ढोल भेर  और  महुवर  नोबत   ध्वनि   घनघोर  बजाई || ५ ||

फूली   फिरत    यशोदारानी     वार    कुंवर   पर वसन   लुटाई |

परमानन्द   नन्दके   आंगन    अमरगण   पोहोपन    झरलाई || ६ ||

दिन दुल्हे मेरो...

ब्याह के और शेहरा के पद

दिन दूल्हे मेरो कुंवर कन्हैया |

नित्य उठ  सखा  शृंगार  बनावे   नित्य ही  आरती उतारत मैया || १ ||

नित्य उठ आँगन चन्दन लिपावे नित्य ही  मोतिन  चौक  पुरैया |

नित्य ही   मंगल   कलश   धरावे   नित्य ही   बंदनवार    बंधैया || २ ||

नित्य उठ ब्याह गीत मंगल ध्वनि नित्य सुरनर मुनि बेद पढैया |

नित्य नित्य आनंद होत वार निधि नित्य ही गदाधर लेत बलैया || ३ ||

माई मेरो लाल दूल्हे बनी आयो

ब्याह और शेहरा के पद

माई मेरो लाल दूल्हे बनी आयो |

रत्नजटितको  सीस  शेहरो  हिरा  मोतिन   लाल जरायो || १ ||

नन्दरायको    कुंवर   कन्हैया   जसुमति   लाड   लड़ायो |

रसिक प्रीतमजूकी बानिक निरखत रोम रोम सुख पायो || २ ||

मैया मोहि ऐसी दुल्हनि भावै

मैया मोहि ऐसी दुल्हनि भावै |

जैसी ये काहूकी डिठोनिया  रुनक  झुनक  घर   आवे || १ ||

करकर पाक रसाल रसोई अपने कर ले मोहि जिमावे |

कर अंचल  पट  ओट   बाबाको   ठाढ़ी   ब्यार   ढुरावे || २ ||

मोहि   उठाय   गोद   बैठारे   कर   मनुहार     मनावे |

अहो  मेरे  लाल   कहो   बावासों   तेरो   ब्याह  करावे || ३ ||

नंदराय   नंदरानी   हिलमिल    सुख   समुद्र    बढावे |

परमानन्द प्रभुकी  बातें  सुन   आनंद  उर न  समावे || ४ ||