मेरे रामलला को सोहिलो सुन, नाच्यो सुर नर नारी हो ।
उमग उमग आनंद में डोलें, तन मन धन सब वारि हो ।। १ ।।
गृह गृह तें सब सजी चले हो, अपनें अपनें टोल हो ।
देत बधाई रहसि परस्पर, गावत मीठे बोल हो ।। २ ।।
मंगल साज संवार कें हों, हाथन कंचनथार हो ।
मानों कमलन शशि चढ़ चले हो, राजा दशरथ के दरबार हो ।। ३ ।।
अवधपुरी अति सोहिये हो, मंगलपुर हि निशान हो ।
मौतिनचौक पुराय कें हो, मंगल विविध विधान हो ।। ४ ।।
देव पितर गुरु पूजकें हो, जातकर्म सब कीने हो ।
द्विजवर कुल सनमान देकें, दान बहुविध दीने हो ।। ५ ।।
मागध सूत बिरदावली हो, सूरजवंश बखान हो ।
याचकजन पूरण किये हो, दानमान परिधान हो ।। ६ ।।
विधि महेश सुर शारदा हो, देख सिहात समोद हो ।
ध्यान धरे नहीं पाईयें हो, सो देखो कौशल्या की गोद हो ।। 7 ।।
विविध कुसुम बरखा भई हो, आनंद प्रेम प्रकाश हो ।
रामलला के रूपपें जन, बलबल गोविन्ददास हो ।। ८ ।।
