बरसानै की नवल नारि मिली होरी खेलनि आंई हो ।
बरबट धाई जाई जमुना तट घेरे कुंवर कन्हाई हो ।। १ ।।
अति झीनीं केसरी रंग भीनीं सारी सुरँग सुहाई हो ।
कंचन बरन कंचुकी ऊपर झलकत जोबन झांई हो ।। २ ।।
केसरी कस्तूरी मलयागिरि भाजन भरि भरि लाई हो ।
अबीर गुलाल फेंटी भरि भामिनी करन कनक पिचकाई हो ।। ३ ।।
उत तैं गोप सखा सब उमंगे खेल मच्यौं उदमाई हो ।
बाजत ताल मृदंग झांझ ढफ मुरली मधुर सुनाई हो ।। ४ ।।
खेलति खेलति रसिक सिरोमनि राधा निकट बुलाई हो ।
हृषिकेश प्रभु रिझि स्याम धन बनमाला पहिराई हो ।। ५ ।।
No comments:
Post a Comment